फेसबुक पेज सञ्चालन गर्दै आफूलाई पत्रकार बताई उद्योगी तथा व्यवसायीलाई धम्की दिएर रकम असुल्ने गरेको घटना सार्वजनिक भएको छ । यस घटनाप्रति नेपाल पत्रकार महासंघ झापाले गम्भीर ध्यानाकर्षण जनाउँदै यस्ता विकृति तत्काल रोक्न र संलग्न व्यक्तिमाथि कडा कानुनी कारबाही गर्न सम्बन्धित निकायसँग माग गरेको छ ।
महासंघले सोमबार जारी गरेको विज्ञप्तिमा केही व्यक्तिले सामाजिक सञ्जालमार्फत आफूलाई पत्रकारका रूपमा प्रस्तुत गर्दै विभिन्न सञ्चार संस्थाको नाम दुरुपयोग गरी आर्थिक लाभ लिन खोजेको पाइएको जनाएको छ । यसले पत्रकारिताको मर्यादा र विश्वसनीयतामाथि गम्भीर प्रश्न उठाएको महासंघको भनाइ छ ।
महासंघका अनुसार झापा हल्दिबारी गाउँपालिका १ निवासी नितेश ओलीले आफू विभिन्न सञ्चार माध्यममा कार्यरत रहेको भनी झुठो विवरण प्रस्तुत गर्दै केही उद्योगी तथा व्यवसायीसँग रकम माग्ने गरेको जानकारी प्राप्त भएको छ । उनले ठोस खबर डटकम, पूर्वीगर्जन मिडिया प्रालि लगायतका सञ्चार संस्थाको नाम प्रयोग गरी रकम मागेको आरोपसमेत लगाइएको छ ।
आफ्नो संस्था र प्रतिष्ठाको दुरुपयोग भएको भन्दै केही सञ्चारमाध्यमका सञ्चालकहरूले महासंघसमक्ष गुनासो गरेका छन् । महासंघले पत्रकारिताको आवरणमा हुने यस्ता गतिविधि पूर्ण रूपमा गलत भएको भन्दै यसले समग्र सञ्चार क्षेत्रको साखमा नकारात्मक असर पार्ने चेतावनी दिएको छ ।
महासंघले पत्रकारिता कुनै पनि प्रकारको धाकधम्की, बार्गेनिङ वा आर्थिक लाभको माध्यम नभई समाजप्रति उत्तरदायी पेशा भएको स्मरण गराउँदै यस्ता कार्यले पेशाको विश्वसनीयता कमजोर बनाउने जनाएको छ ।
विज्ञप्तिमा पत्रकारिताको नाममा धम्की दिने, अनुचित आर्थिक लेनदेन गर्ने वा रकम माग्ने कार्य भएमा तत्काल सम्बन्धित निकायमा उजुरी गर्न उद्योगी, व्यवसायी तथा सर्वसाधारणलाई आग्रह गरिएको छ । साथै, यस्ता गतिविधि रोक्न सबै पक्ष सचेत र एकजुट हुनुपर्नेमा महासंघले जोड दिएको छ ।
महासंघले सामाजिक सञ्जालका पेजमार्फत पत्रकारिताको नाम दुरुपयोग गर्ने व्यक्तिहरूलाई यस्तो गतिविधि तत्काल बन्द गर्न चेतावनी दिँदै घटनामा संलग्न व्यक्तिमाथि निष्पक्ष अनुसन्धान गरी कानुनी दायरामा ल्याउन सम्बन्धित निकायसँग माग गरेको छ ।
