काठमाडौं ।
जिल्ला प्रहरी परिसर काठमाडौँले चलाएको ‘स्वीप अपरेशन’का क्रममा १ हजार ४१० जनालाई पक्राउ गरि कारबाही गरेको छ ।
जेठ महिनाभर सञ्चालित अभियानका क्रममा प्रहरीले काठमाडौंका विभिन्न क्षेत्रमा १९९ जना महिला, १ हजार २१८ पुरुष र अन्य ३ जनालाई नियन्त्रणमा लिई कानुनी कारबाही गरेको परिसरका प्रहरी उपरीक्षक पवनकुमार भट्टराईले बताए ।
अपराध न्यूनीकरण र समाजमा शान्ति सुव्यवस्था कायम गराउन सञ्चालित स्वीप अप्रेसनका क्रममा काठमाडौंको ठमेल क्षेत्रमा स्वदेशी तथा विदेशी नागरिकलाई अश्लिल कार्यका लागि दुःख हैरानी दिने युगाण्डा, भियतनाम, थाइल्यान्ड, बङ्गलादेश र केन्याका २१ महिलालाई नियन्त्रणमा लिई ‘डिपोर्ट’ गरिएको प्रहरीले जनाएको छ ।
जघन्य र गम्भीर अपराधका संलग्न २५७, महिला, बालबालिका तथा ज्येष्ठ नागरिकसँग सम्बन्धित ५१, आर्थिक अपराध ४९४ र अन्य ३५८ गरी १ हजार १६० मुद्दा दर्ता गरिएको प्रहरीको भनाइ छ ।
त्यस्तै, सम्पत्ति शुद्धीकरणसम्बन्धी १ मुद्दामा अनुसन्धान भइरहेको र हुण्डीसम्बन्धी २ मुद्दामा २० लाख ७५ हजार ५०० बिगो रकमसहित मुद्दा दर्ता भएको प्रहरीले जानकारी दिएको छ ।
