कालीकोटमा डियुटिमा खटिएका बेला एक्कासी बिरामी परेका एक प्रहरी सहायक निरीक्षक (असइ) को उपचारका क्रममा निधन भएको छ।
जिल्ला प्रहरी कार्यालय कालीकोटका सूचना अधिकारी गणेश ज्ञवालीका अनुसार जिल्लाको तिलागुफा नगरपालिका वडा नं. ५ स्थित प्रहरी चौकी खल्लागाडमा कार्यरत ४८ वर्षीय प्र.स.नि. लिला बहादुर खत्रीको निधन भएको हो।
जेठ ११ गते बिहान ९:४० बजेको समयमा ड्युटीमा रहेका बेला खत्रीलाई एक्कासि छाती दुखेको बताएका खत्री छाती दुख्ने समस्यासँगै बेहोस भएपछि तत्कालै उपचारका लागि एम्बुलेन्समार्फत जिल्ला अस्पताल मान्म कालीकोट ल्याइएको थियो ।
अस्पतालमा उपचारकै क्रममा चिकित्सकले दिउँसो १२:२५ बजे उनलाई मृत घोषणा गरेको जिल्ला प्रहरी प्रमुख हिम वहादुर खत्रीले बताए । उनको पोस्टमार्टम हुन बाँकि छ ।
बाँके जिल्लाको राप्ती सोनारी गाउँपालिका वडा नं. २ स्थायी घर भएका खत्रीको दरबन्दी इलाका प्रहरी कार्यालय पचालझरना, कालीकोटमा रहेको थियो भने उनी दुई महिनादेखि तिलागुफा नगरपालिकाको खल्लागाड प्रहरी चौकीमा कार्यरत थिए।
