राष्ट्रिय स्वतन्त्र पार्टी (रास्वपा)का सांसद गणेश कार्कीले लुसिफर राइजिङ नाकटका निर्देशकलाई दिइएको भनिएको धम्कीबारे आफूहरूले बुझिरहेको बताएका छन् । सरकारको नाटक रोक्ने सोचाइ नै नभएको भन्दै उनले निर्देशकसँग बुझ्ने प्रयास गरेको बताएका हुन् ।
‘लुसिफर राइजिङ नाटक राजनीतिक कारण र सुरक्षा भन्दै बन्द गराएको बारेमा मेरो चासो छ । सरकार र पार्टीसँग बुझ्दा त्यो नाटक चल्न नपाउने भन्ने सोचाइ नै नभएको पाएको छु । कसले धम्की दिएको भन्ने बारेमा बुझ्न खोज्दा सो नाटकका निर्देशकसँग सम्पर्क हुन सकेको छैन । थप बुझ्ने क्रममा छु,’ कार्कीले लेखेका छन्, ‘निर्बाध कलाकारिता, स्वतन्त्र पत्रकारितालगायत विषय लोकतन्त्रका अभिन्न अंग हुन् । यसमा सीमा लगाउने कुरा यो सरकारले सोचेको छैन भन्ने प्रमाण भर्खरै भएको सेन्सर बोर्डमा भएको परिवर्तनबाट पनि बुझ्न सकिन्छ । हाल भएको निर्णयअनुसार फिल्ममा अब यो सिन काट् र त्यो फेर् भनिँदैन, कुन दर्शकले हेर्न मिल्ने कि नमिल्ने चै छुट्याइन्छ । यसैले सो नाटकका निर्देशकलाई सम्पर्कमा आउन तथा धम्की दिने जो कोही भए पनि जानकारी दिएर अनुसन्धानमा सहयोग गर्न आग्रह गर्छु ।’
