दमक । युवालाई खेलकुदतर्फ आकर्षित गर्दै लागूऔषध तथा सामाजिक विकृति विसंगतिबाट टाढा राख्ने उद्देश्यसहित दमकमा रहेको पूर्वेली युथको आयोजनामा फुट्सल प्रतियोगिता हुने भएको छ ।
‘दुर्व्यासनबाट टाढा रहौं, खेलमार्फत भविष्य उज्यालो बनाऔं’ भन्ने मूल नारासहित आयोजना गर्न लागिएको उक्त प्रतियोगिता यही जेठ ४ र ५ गते सञ्चालन हुने आयोजकले जनाएको छ । प्रतियोगिताका सम्पूर्ण खेल दमक १ भाङबारीमा अवस्थित फुट्सल मैदानमा खेलाइनेछन् ।
आयोजकका अनुसार प्रतियोगितामार्फत युवामा अनुशासन, सकारात्मक सोच तथा खेल संस्कृतिको विकास गर्ने लक्ष्य राखिएको छ । साथै खेलकुदमार्फत युवाहरूलाई स्वस्थ, सभ्य र जिम्मेवार समाज निर्माणतर्फ प्रेरित गर्ने उद्देश्यसमेत रहेको बताइएको छ ।
प्रतियोगिताको विजेताले नगद रु २० हजारसहित मेडल, ट्रफी र प्रमाणपत्र प्राप्त गर्नेछ भने उपविजेताले नगद रु १० हजारसहित मेडल, ट्रफी र प्रमाणपत्र प्राप्त गर्ने आयोजकले जनाएको छ ।
त्यसैगरी, विधागत पुरस्कारअन्तर्गत म्यान अफ दि टुर्नामेन्ट, बेस्ट गोलकिपर, हाई स्कोरर तथा उदयिमान खेलाडीलाई समेत पुरस्कृत गरिनेछ ।
प्रतियोगितामा सहभागी हुन चाहने टोलीका लागि टिम दर्ता शुल्क रु २ हजार ५ सय निर्धारण गरिएको आयोजकले जनाएको छ । प्रतियोगिताको तयारी अन्तिम चरणमा पुगेको भन्दै आयोजकले पत्रकार सम्मेलनमार्फत कार्यक्रमबारे जानकारी गराएको हो ।
