दमक ।
राष्ट्रिय स्वतन्त्र पार्टी (रास्वपा) ले महाधिवेशनका प्रतिनिधिको शुल्क ५ हजार र केन्द्रीय सदस्य पदका उम्मेदवार हुन २१ हजार मनोनयन शुल्क तोकेको छ ।
केन्द्रीय समितिको पदाधिकारीतर्फ सभापतिको लागि मनोनयन शुल्क ५१ हजार, उपसभापति, महामन्त्री र सहमहामन्त्रीको उम्मेदवार हुन ४१ हजार मनोनयन शुल्क तोकिएको छ ।
त्यस्तै, महाधिवशेनमा पर्यवेक्षकका रूपमा सहभागी हुनलाई पार्टीले ७ हजार शुल्क तोकेको हो ।
रास्वपा औपचारिक गठन भएको ४ वर्षपछि हुन लागेको प्रथम महाधिवेशनमा ३ हजार आसपास प्रतिनिधि सहभागी हुने रास्वपा निर्वाचन आयोगले जनाएको हो ।
७–९ असारमा चितवनमा हुने रास्वपा महाधिवेशनका लागि आर्थिक रूपले विपन्न सदस्यहरूको लागि पार्टीले सहायता कोष सञ्चालन गर्ने बताएको छ ।
महाधिवेशन सम्पन्न गर्न मूल आयोजक समिति सहित १८ वटा उपसमिति गठन गरेको छ ।
महाधिवेशनले सभापति १, उपसभापति महिला १ सहित ३, महामन्त्री २, सहमहामन्त्री १ महिलासहित ४ जना निर्वाचित गर्नेछ । कोषाध्यक्ष, सह कोषाध्यक्ष, प्रवक्ता १/१ जना र र सह–प्रवक्ता ३ जना मनोनित गर्ने विधानतः व्यवस्था छ ।
९९ जना केन्द्रीय सदस्य निर्वाचित हुनेछन् भने २२ जना सभापतिले मनोनित गर्ने व्यवस्था छ । ७ प्रदेशका सभापतिहरू केन्द्रीय समितिको पदेन सदस्य हुनेछन् ।
