दमक ।
नेपाल कम्युनिष्ट पार्टीका नेता कृष्णबहादुर महराले सक्रिय राजनीतिबाट बिदा हुने निर्णय गरेका छन् ।
आफ्नो ७०औँ जन्मदिनको अवसर पारेर बिहीबार नेता महराले स्वास्थ्यको कारण देखाउँदै राजनीतिबाट बिदा लिने बताएका हुन् ।
उनले एक वक्तब्य जारी गर्दै भनेका छन्, ‘उमेरको ७०औँ वर्षमा प्रवेश गर्दै गर्दा, लामो समयदेखि स्वास्थ्यमा देखिएको अस्वस्थताका कारण सक्रिय राजनीतिबाट बिदा हुने निर्णय गरेको छु ।’
विद्यार्थीकालदेखि राजनीतिमा प्रवेश गरेका महराले करिब ५ दशकको राजनीतिक यात्रामा तत्कालीन नेकपा (माओवादी) को १० वर्षे सशस्त्र जनयुद्धमा केन्द्रीय नेतृत्व तहमा रहेर सरकारसँगको वार्ता टोली सदस्य जस्तो महत्वपूर्ण भूमिका निर्वाह गरेका थिए ।
०६२/६३ को राजनीतिक परिवर्तन र शान्ति प्रक्रियापछि अन्तरिम व्यवस्थापिका संसद्को सदस्य बनेका उनी ०७५ मा प्रतिनिधिसभाको सभामुख भएका थिए ।
माओवादी केन्द्र हुँदै हाल नेकपाका संयोजक पुष्पकमल दाहाल प्रचण्डका विश्वास पात्र मानिने महराले विभिन्न समयमा सञ्चारमन्त्री, गृहमन्त्री, अर्थमन्त्री र उपप्रधानमन्त्रीसमेतको जिम्मेवारी सम्हालेका थिए ।
महरालाई ०७६ मा यौन दुव्र्यवहार सम्बन्धी लागेको आरोपका कारण सभामुख पदबाट राजीनामा दिएका थिए ।
उनले आफ्नो राजनीतिक यात्रामा साथ, सहयोग, विश्वास गर्ने सबैप्रति ऋणी रहने वक्तव्यमा उल्लेख गरेका छन् ।
