झापा । दमक–९ र १० को सिमानामा पर्ने जीर्ण सडकको स्तरोन्नति हुन नसकेको भन्दै स्थानीयवासीले सडकमै धान रोपेर विरोध जनाएका छन् । वर्षौंदेखि हिलो, पानी र खाल्डाखुल्डीले भरिएको सडकका कारण आवतजावतमा समस्या भएपछि स्थानीयले सांकेतिक रूपमा धान रोप्दै सम्बन्धित निकायको ध्यानाकर्षण गराएका हुन् ।
स्थानीयका अनुसार सडक निर्माणका लागि पटकपटक आग्रह गरिए पनि कुनै निकायले चासो नदिएपछि बाध्य भएर विरोध गर्नुपरेको हो । किसानहरूले वर्षामा हिलो र हिउँदमा धुलोले जनजीवन प्रभावित भएको, बिरामी, विद्यार्थी तथा सर्वसाधारणलाई सास्ती खेप्नुपरेको बताएका छन् ।
उनीहरूले चुनावका बेला मात्र आश्वासन दिने तर निर्वाचित भएपछि जनप्रतिनिधिहरूले समस्या बिर्सिने गरेको गुनासो गर्दै अब आश्वासन होइन, काम चाहिएको बताएका छन् । ‘जुनै जोगी आए पनि कानै चिरेको’ भन्दै स्थानीयले सडकको अवस्था सुधार नभए थप सशक्त आन्दोलनमा उत्रिने चेतावनी दिएका छन् ।
