झापाको झापा गाउँपालिका–४ बालुबाडी क्षेत्रमा भारतबाट नेपालतर्फ अवैध रूपमा लुकाईछिपाई ल्याउँदै गरिएको करिब १५० केजी मरेको माछा प्रहरीले बरामद गरेको छ । बरामद माछाको अनुमानित मूल्य रु ४५ हजार रहेको प्रहरीले जनाएको छ ।
इलाका प्रहरी कार्यालय कुमरखोदबाट खटिएको गस्ती टोलीले मंगलबार साँझ उक्त माछा बरामद गरेको हो । माछा ओसारपसारमा प्रयोग गरिएको ११ प ३९४२ नम्बरको मोटरसाइकल पनि फेला पारी नियन्त्रणमा लिइएको प्रहरीले जनाएको छ ।
प्रहरी टोलीलाई देख्नेबित्तिकै अवैध माछा ल्याउने व्यक्ति फरार भएका छन् । नियन्त्रणमा लिइएको मोटरसाइकल इलाका प्रहरी कार्यालय कुमरखोदमा राखिएको छ ।
बरामद गरिएको माछा साँझ करिब ६ बजे झापा गाउँपालिका–१ का वडा सदस्य कमल बहादुर लिम्बु तथा स्थानीय भद्रभलाद्मीको रोहबरमा खाल्डोमा पुरी नष्ट गरिएको प्रहरीले जनाएको छ ।
