काठमाडौं ।
अमेरिकी कुटनीतिज्ञहरुको नेपाल भ्रमण बाक्लिएको छ । दक्षिण तथा मध्य एसिया मामिला हेर्ने सहायक विदेश मन्त्री एस. पावल कपुर नेपाल भ्रमण आएर फर्किए लगत्तै अमेरिकी राष्ट्रपति डोनाल्ड ट्रम्पका विश्वास पात्रमध्ये एक सर्जियो गोर नेपाल भ्रमण आउँदै छन् ।
दक्षिण तथा मध्य एसियाका लागि विशेष दूत गोर भारतका लागि अमेरिकी राजदूत पनि हुन् । उनी भारतबाट वैशाख १७ गते सिधै नेपाल आउने भएका हुन् । उनको नेपाल भ्रमण चार दिनको रहने बताइएको छ ।
राजदूत सर्जियोको नेपाल भ्रमणका सन्दर्भमा भारतस्थित नेपाली दूतावासका उपप्रमुख डा. सुरेन्द्र थापाले भारतस्थित अमेरिकी दूतावासका उपप्रमुख जेसन मिकसँग भेट गरेका छन् । दुई जना बिचको भेटमा राजदूत सर्जियाको नेपाल भ्रमणका विषयमा कुराकानी भएको भारतस्थित नेपाली दूतावास स्रोतले जनाएको छ ।
नेपाल भ्रमणका क्रममा गोरले प्रधानमन्त्री बालेन्द्र शाह (बालेन)सँग भेटघाट गर्ने बताइए पनि त्यसको आधिकारिक पुष्टि भएको छैन ।
सर्जियोले बालेनसँग जेठ १ गते भेट्ने कार्यतालिका रहेको स्रोतको भनाइ छ । तर प्रधानमन्त्री कार्यालयले भने हालसम्म भेट हुने नहुने कुरा निश्चित गरेको छैन ।
केही दिनअघि नेपाल भ्रमणमा आएका अमेरिकी विदेश मन्त्रालयका दक्षिण तथा मध्य एसिया मामिला हेर्ने सहायक विदेश मन्त्री एस. पावल कपुरले पनि प्रधानमन्त्री बालेनसँग भेट्न चाहेका थिए । तर, कपुरलाई बालेनले भेट दिएनन् ।
उनले अर्थमन्त्री स्वर्णिम वाग्ले र परराष्ट्रमन्त्री शिशिर खनाललाई भेटेका थिए भने राष्ट्रिय स्वतन्त्र पार्टीका सभापति रवि लामिछानेसँग पनि भेटघाट गरेका थिए ।
अमेरिकाले नेपालमा रहेका राजदूत डिन थम्पसनलाई फिर्ता बोलाएपछि राजदूत सर्जियोले भारतबाट नेपाल मामिला हेरिरहेका छन् । नेपालमा चार महिनादेखि अमेरिकी राजदूत छैनन् ।
राष्ट्रपति ट्रम्पको सचिवालयमा काम गरिसकेका सर्जियोको भ्रमण एउटा राजदूतको रूपमा मात्र नभई ट्रम्पको दूतको रूपमा भइहरेको जानकारहरू बताउँछन् । नेपालको भूराजनीतिक मामिलाका एक जानकारले भने, ‘यो कपुरको जस्तो भ्रमण होइन, उहाँको भ्रमणले धेरै कुराको निर्धारण हुन्छ ।’
