झापा
कमल गाउँपालिकाले ट्याक्टरबाट गरिने जोताइ सेवामा शुल्कको एकरूपता कायम गर्ने निर्णय गरेको छ । गाउँपालिकाले बुधबार सूचना जारी गर्दै पालिकाभित्र सञ्चालन हुने ट्याक्टर जोताइ सेवाको न्यूनतम शुल्क निर्धारण गरिएको जनाएको हो ।
गाउँपालिकाका अनुसार जेठ ११ गते व्यवसायी, कृषक, प्राविधिक कर्मचारी तथा जनप्रतिनिधिको उपस्थितिमा बसेको बैठकले सेवा शुल्क निर्धारण गरेको हो । इन्धन आपूर्तिमा सहजता र मूल्य परिवर्तनका आधारमा आगामी दिनमा शुल्क परिमार्जन गरिने पनि सूचनामा उल्लेख छ ।
निर्धारित शुल्कअनुसार कल्टिभेटरबाट जोताइ गर्दा प्रतिघण्टा २ हजार ४ सय रुपैयाँ, तावा हलोबाट जोताइ गर्दा २ हजार ५ सय रुपैयाँ तथा रोटाभेटरबाट जोताइ गर्दा २ हजार ६ सय रुपैयाँ सेवा शुल्क कायम गरिएको गाउँपालिकाले जनाएको छ ।
गाउँपालिकाले सम्बन्धित सबै सेवा प्रदायक तथा कृषकलाई निर्धारण गरिएको शुल्कअनुसार सेवा लिन दिन आग्रह गरेको छ ।
