हिजो आत्महत्या गरेका दार्चुलाको सुन्सेरास्थित सम्पाल माध्यमिक विद्यालयका प्रधानाध्यापक बलदेव सिंह धामीको आज दाहसंस्कार गरिएको छ । विद्यालय सुधारमा लागेका उनले आफू विद्यालयमै झुण्डिन बाध्य भएको व्यहोरा लेखेका थिए ।
सामाजिक सञ्जालमा स्ट्याट्स लेख्दै आफूलाई मर्न बाध्य बनाउनेहरुको नाम सार्वजनिक गरेका हुन् । धामीको आज महाकाली नदीमा दाहसंस्कार गरिएको छ भने पक्राउ परेकाहरुविरुद्ध म्याद थपपछि अनुसन्धान थालिएको छ ।
दम्फाका प्रधानाध्यापक प्रमानन्द भट्ट, सम्पालका शिक्षकहरु दलिदत्त भट्ट, पदमराज भट्ट, हरि भट्ट, पुष्करराज भट्ट, नेपाली काँग्रेसको पालिका सभापति नरेन्द्र भट्ट र ठेकेदार खेमराज भट्टलगायतले आफूलाई फसाउन अख्तियार दुरुपयोग अनुसन्धान आयोगमा उजुरी हालेको, छात्रामाथि बलात्कार गरेको आरोपमा शिक्षकलाई समात्न लगाएको उनको दाबी छ ।
उनले लेखेका छन्,‘मेरो इमानमा यी दुष्मनहरुले सिंगो सुन्सेरा समुदायमा र आफ्नो घर–घरमा फोन तथा अन्य माध्यमबाट सूचना प्रवाह गरी पदमराज भट्टले अन्य पालिकाका शिक्षक–प्रअहरुलाई समेत फोन गरी कपोकल्पित असत्य बलात्कारको आरोप लगाएर मेरो शैक्षिक इतिहास समाप्त गरी स्वाभिमानमा गम्भीर चोट पुगेकोले र डिप्रेशनको सिकार भएर आत्महत्या गर्न बाध्य भएको छु ।’
