झापाको दमकमा एक व्यक्तिले सामाजिक सञ्जालमा चार जनाको फोटो पोस्ट गरेपछि आत्महत्या गरेका छन् ।
दमक–८ लक्ष्मीमार्ग टोल निवासी ४२ वर्षीय पिताम्बर खड्काले चार जना साथीका कारण आफू आत्महत्या गर्न बाध्य भएको आशय व्यक्त गर्दै उनीहरूको सामूहिक फोटो फेसबुकमा पोस्ट गरेको प्रहरीले जनाएको छ ।
खड्काले दीपचन्द्र रेग्मी, अनमिका कुँवर सिंह, सुरेन्द्र रेग्मी र सुमन पोखरेलको नामसहितको फोटो पोस्ट गरेपछि आज साँझ करिब ५ बजे आफ्नै घरको भुइँतलाको कोठामा झुन्डिएको अवस्थामा फेला परेका हुन् । उनले सिलिङ फ्यान झुन्ड्याउने फलामको हुकमा प्लास्टिकको पासो प्रयोग गरी आत्महत्या गरेको इलाका प्रहरी कार्यालय दमकले जनाएको छ ।
मृतकका बुवा महेश खड्काले छोरालाई झुन्डिएको अवस्थामा देखेपछि प्रहरीलाई खबर गरेका थिए । त्यसपछि प्रहरी निरीक्षक नवीन राईको कमाण्डमा टोली खटिएर घटनास्थलको मुचुल्का तयार गरी थप अनुसन्धान तथा कानुनी प्रक्रिया अघि बढाइएको प्रहरीले जनाएको छ ।
मृतक खड्काको शव पोस्टमार्टमका लागि दमक अस्पताल लगिएको दमक–८ का वडा अध्यक्ष धर्मप्रसाद दाहाल (दीपेश) ले जानकारी दिए । खड्का हाल ग्लोबल आईएमई बैंकको विराटनगर शाखामा कार्यरत रहेको बुझिएको छ ।
