दमक ।
ताप्लेजुङमा अवस्थित याक्थुङ लिम्बू जातिको मुन्धुमी क्षेत्र र पवित्र धार्मिक तीर्थस्थल सेमुक्तुकोक्/मुकुम्लुङ (पाथिभरा) मा व्यापारी चन्द्र ढकालको कम्पनी ग्लोबल आइएमई ग्रुपले बनाउन सुरु गरेको केबलकार बारे अध्ययन गर्न कार्यदल गठन भएको छ ।
प्रधानमन्त्री तथा मन्त्रिपरिषद् कार्यालयले केबलकार निर्माण रोक्नुपर्ने पक्षको माग बमोजिम त्यहाँ उत्पन्न विवादको बारेमा अध्ययन गर्न र उत्पन्न विवाद र समस्या समधानका लागि कार्यदल गठन भएको हो ।
प्रधानमन्त्री तथा मन्त्रिपरिषद् कार्यालयको सचिवस्तरको निर्णय अनुसार प्रधानमन्त्री बालेन्द्र शाहका सामाजिक विकास विज्ञ विश्व राईको संयोजकत्वमा सात सदस्यीय कार्यदल गठन भएको हो ।
समितिका सदस्यमा पूर्वाधार विकास मन्त्रालयका सिनियर डिभिजनल इन्जिनियर, केबलकार निर्माणको बिरोधमा रहेका पक्षका प्रतिनिधि, पाथीभरा क्षेत्र विकास समितिको प्रतिनिधि सदस्य छन् ।
त्यस्तै, केबलकार निर्माण कम्पनीका प्रतिनिधि, गृह मन्त्रालयका उपसचिव र प्रधानमन्त्रीको सचिवालयका स्वकीय सहसचिव कार्यदलमा सदस्य रहने बताइएको छ ।
कार्यदललाई सेमुक्तुकोक्/मुकुम्लुङ (पाथिभरा) मा केबलकार निर्माणका कारण उत्पन्न विवाद र समस्याको पहिचानगरी सोको समधानका लागि १५ दिनभित्र सुझाब पेस गर्न समय तोकिएको छ ।
