राष्ट्रिय स्वतन्त्र पार्टी (रास्वपा) सभापति रवि लामिछानेसँग भारतका लागि अमेरिकी राजदूत सेर्गियो गोरले नयाँ दिल्लीमा भेटवार्ता गरेका छन् । मध्य तथा दक्षिण एशियाका लागि अमेरिकी राष्ट्रपति डोनाल्ड ट्रम्पका विशेषदूत गोरले लामिछानेलाई एक महिनाअघि काठमाडौंमा पनि भेटेका थिए ।
तर,भारत भ्रमणमा रहेका लामिछानेसँग भारतीय प्रधानमन्त्री,विदेशमन्त्री,गृहमन्त्री, भाजपा अध्यक्षलगायतले भेटेपछि अमेरिकी राजदूतले भेट गर्नुलाई राजनीतिक वृत्तमा अर्थपूर्ण ठानिएको छ । भेटबारे जानकारी गराउँदै हिजो साँझ गोरले सामाजिक सञ्जालमार्फत अमेरिकाले नेपालसँगको सम्बन्धलाई उच्च प्राथमिकता दिएको र नेपालको समृद्धिमा सहयोग गर्ने धारणा लेखेका छन् ।
गोर गत महिना नेपाल भ्रमणमा आउँदा वैशाख १९ गते रविसँग बूढानीलकण्ठस्थित उनकै निवासमा भेटेका थिए । त्यतिबेला भारतीय सचिव विक्रम मिश्री काठमाडौं आउन लागेको खबर थियोे । उनीभन्दा केही दिनअघि गोर आएका थिए । प्रधानमन्त्री मोदीको निम्तो बोकेर आउन लागेका मिश्रीलाई प्रधानमन्त्री बालेन्द्र शाहले नभेट्ने संकेत पाएपछि भ्रमण रोकिएको थियो । त्यसपछि चिसिएको दुई देशबीचको सम्बन्ध तताउन परराष्ट्रमन्त्री शिशिर खनाल आज नयाँ दिल्ली जाँदैछन् ।
