नेपाली सेनाको बीरबल गणले आयोजनामा पाँचथरको कुम्मायक गाउँपालिका केन्द्र वडा नम्वर १, यासोकमा गरिएको बृहत स्वास्थ्य शिविरमा एक हजार चार सय ७९ जनाको स्वास्थ परिक्षण गरिएको छ । शिविरमा स्वास्थ्य परीक्षण, औषधी वितरण तथा आवश्यक परामर्श सेवा प्रदान गरिएको थियो ।
नेपाली सेनाको आयोजना तथा कुम्मायक गाउँपालिकाको व्यवस्थापनमा भएको दुई दिने शिविरमा कुम्मायक, फाल्गुनन्द, तुम्बेवा र मिक्लाजुङ गाउँपालिकाका नागरिकलाई स्वास्थ्य सेवा प्रदान गरिएको हो । शिविर जेठ १३ र १४ गते सञ्चालन भएको हो ।
२० जना विशेषज्ञ डाक्टर सहितका चिकित्सकको उपस्थितीमा भएको शिविरमा हाडजोर्नी परिक्षण, आँखा, स्त्रीरोग, नाक–कान–घाँटी, दन्त, छाला तथा मानसिक स्वास्थ्य सहित ११ वटा बिशेषज्ञ बिभाग मार्फत सेवा प्रदान गरिएको बीरबल गणले जनाएको छ ।
शिविर समापन कार्यक्रममा नेपाली सेनाको पुर्वी पृतना हेडक्वाटर इटहरीका पृतनापति उपरथी गौरवकुमार केसी सहित सुरक्षा प्रमुख, सरकारी कार्यालयका प्रमुखहरु, जनप्रतिनिधि, स्थानीय लगायतको उपस्थिती रहेको थियो ।
आर्थिक अभाव, भौगोलिक कठिनाईका कारण अस्पताल पुगेर स्वास्थ्य सेवा लिन नसक्ने नागरिकहरुका लागि शिविर प्रभावकारी देखिएको नेपाली सेनाले जनाएको छ ।
